hüt hani wieder mal Seich gmacht mitem Papi ufem Sofa.

Grimasse schnide chani scho fast so guet wie dä Papi 😉

hüt hän ich mal i dä Stube dörfe füsi mache – uf eusem riise grosse Bettsofa.

träume chamer uf dem super Bett eifach wunderbar!

vo dä Nachbarin hämmer ä ganz ä tolli Schauklä übercho – die hani hüt zum 1. mal dörfe usprobiere!

klappet häts wunderbar und ich finds mega lässig wäni selber chan aagä unds immer so schön ufä und abä wippet – ä tolli Sach so ä Schauklä 😉

Wämmer d’Lucy so gseht chönt mer grad meine ich hegi id Hose gmacht. Angst hani uf jede Fall kei gha – ev. hani ja vor luuter Freud id Hose gmacht 😉

Am Mami und am Papi gfallts natürli au ganz guet dass sie mich jetzt ändlich mal chönd neumäd anäsetzä und ich nöd ständig wieder abärutsche. Irgendwo anäleggä funktioniert nämmli nümm – das passt mir nämmli gar nöd – ich tuen lieber höckle!

Jetzt mal luege wie lang ich freud han a dem tolle Schaukel-Dings-Bums und suscht stigi dänn halt um ufs Velo – so eis hani nämmli dä Samstig au no übercho 😉

bis bald
euä Yari

Min Papi isch scho än rächte Gloon – han uu Freud wänn er amig Seich macht mit mir! Im Grimasse schnide isch er eifach super, aber ich hans glaub au scho langsam guet im Griff 😉

ganz süessi Träum hani gha woni am Fritig Morge ufem Sofa iipfüselet bin.

Spöter simmer dänn all zämä uf Zurzach go bädele – isch uu schön gsi (zumindest dänn wämmer im Wasser gsi sind). Han so än lustige gääle Schwümmring gha woni schön han chöne drihöcke und s’Mami und dä Papi händ mi dänn chli im Wasser umenand gschobe 😉 Isch no chli gross gsi dä Ring aber defür bini fast ganz im Wasser gsi.

Nachher simmer no uf Dütschland go pöschtele. Hät äs paar ganz feini Breili gä für mich 😉

orange isches gsi – ä komischi Masse und so öppis händs mir hüt welle is Muul schoppe!

Han dänn eifach mis Gsichtli richtig schön verzoge – so hani wenigstens nöd all zu vill vo dem Züüg müese ässä! 😉

Mal luege wänns s’nöchscht mal wieder so ä Masse git ob dänn min Gschmacks-Sinn chli besser uf das aaspricht!

bädele findi eifach toll – vorallem i dä blaue Wösch-Zeine machts richtig Spass.

Jetzt gahts dänn nümm lang und scho hani kei Platz me i dere super Badwanne. Ich hoff jetzt eifach mal dases no ä anderi schöni Wösch-Zeine hät irgendwo so dasi nonig grad i di ganz gross wiss Badwanne muen! 😉

Ich wünsche dir, min liebe Papi, alles alles gueti zum 30. Geburtstag! Bliib so wie d’bisch und lueg wiiterhin so guet zu mir.

dis Yari Mannli 😉

mit äm Simon bini scho im Spital glägä womer beidi no im Buch vo eusnä Mamis gsi sind. Hüt isch dä Simon mit sim Mami dä Sandra zu eus uf Bsuech cho. Mir händs eifach immer uu guet zämä – sind ja au fast glich alt und au fast glich z’früh uf d’Welt cho 😉 Eus gahts beidne super wiemer gseht!

hoffes mir zwei bliibed no ganz lang gueti Fründe so das mir dänn, au no nach eusere Pensionierig, chönd zämä aastosse 😉

Eusi Nachbarin d’Fabienne isch hüt bi eus uf Bsuech gsi – sie hät sich dänn ganz lieb um mich kümmeret und mit mir gspillt.

Isch ganz ä liebi d’Fabienne – han sie scho richtig lieb übercho!

Hoff ich chan bald mit ihre uf dä Spielplatz use chli go spiele: Gireizle, Gigampfe, Rutsche und u Umäsekklä! 😉