Ich wünsche dir, min liebe Papi, alles alles gueti zum 30. Geburtstag! Bliib so wie d’bisch und lueg wiiterhin so guet zu mir.

dis Yari Mannli 😉

mit äm Simon bini scho im Spital glägä womer beidi no im Buch vo eusnä Mamis gsi sind. Hüt isch dä Simon mit sim Mami dä Sandra zu eus uf Bsuech cho. Mir händs eifach immer uu guet zämä – sind ja au fast glich alt und au fast glich z’früh uf d’Welt cho 😉 Eus gahts beidne super wiemer gseht!

hoffes mir zwei bliibed no ganz lang gueti Fründe so das mir dänn, au no nach eusere Pensionierig, chönd zämä aastosse 😉

Eusi Nachbarin d’Fabienne isch hüt bi eus uf Bsuech gsi – sie hät sich dänn ganz lieb um mich kümmeret und mit mir gspillt.

Isch ganz ä liebi d’Fabienne – han sie scho richtig lieb übercho!

Hoff ich chan bald mit ihre uf dä Spielplatz use chli go spiele: Gireizle, Gigampfe, Rutsche und u Umäsekklä! 😉

läck jetzt chani min Chopf scho langsam ganz guet selber ufe hebä.

äs heisst ja „Kopf hoch und vorwärts luege!“ 😉

hüt hani s’erst mal dörfe Model stah und dä Papi hät probiert äs guets Foti z’mache vo mir. Han mi aber immer chli gstreubt und gar nie schön id Kamera glueget – hehehehe.

Bis mer nöd bös Papi, aber hüt hani null Bock gha zum brav anähebä 😉 Trotzdem häts no äs einigermassä guets Foti gä – obwohl mer meint mir fehli ä Hand 😉

hüt hät dä Dokter euse allerliebscht Merlin müese iischlöfere – er hät sich mit dä tödliche Infektion FIP aagsteckt!

Me Infos über FIP gits da:
http://de.wikipedia.org/wiki/Feline_Infekti%C3%B6se_Peritonitis

Mit vermissed dich ganz fest und hoffed dir gahts jetzt besser im schöne Chatze-Himmel!

hüt hani mal probiert – mit Hilf vom Mami – uf dä Mona än chline Usritt z’mache! 😉
wär eigentli ä super Sach nur chani mi nonig selber festhebä, aber au das schaffi no!