grad nach eusnä Ferie hani vo dä Groseltere dä super tolli wissi Ferrari übercho. Jetzt chani ändlich überall i dä Stube umänand fahre und wäni nümm mag stah dänn chani eifach abhocke – ä tolli Sach so än Ferrari 😉

chum eifach nonig so tifig vorwärts aber äs isch au so scho mega cool. Danke nomal vill mal für das super Gschänk – ich bruchs glaub praktisch jede Tag und Spielsache chani au immer mittransportiere uf dem grosse Tablar.

huiiiiiiiiiiiiiiii – isch das super bi dem tolle Wetter über dä Pulverschnee z’fahre mitem Schlitte. D’Sunne hät dä ganzi Tag gschunä und dä Schnee isch au perfekt gsi. Mir sind dä ganzi Tag in Splügen am Schlitte fahre gsi. Leider sind eusi Schlitte chli z’wenig schnell gsi das mir dä Lucy namöge hetted – die isch d’Schlittelpischte abä gsekklät als wär sie än Schwizer 4er Bob a dä WM 😉

das Schoggi-Joghurt hät eifach so fein usgseh – hani doch grad mal müese zuelange! 🙂

fein isch gsi – ganz fein das Cristalina Schoggi Joghurt – hät zwar nur no für 2 Löffel glanget will s’Mami scho alles gmampft hät.

läck macht das Spass da im Schnee. Mir sind jetzt 1 Wuche da in Andeer i dä Ferie. Gester häts gschneit wie verruckt – sind nur ganz churz dusse gsi und händ scho usgseh wie Schneemannä. Hüt isch dänn äs Traumwätter gsi – d’Sunnä hät dä ganzi Tag gschunä und mir sind 2 mal ganz lang go spaziere im Schnee.

ich hoffä äs isch no di ganzi Wuche so schöns Wetter damit mir ganz vill verusä chönd go spaziere – det chani nämmli immer so schön pfuuse im Rucksack oder mitem Papi Seich mache 😉

d’Lucy hät au voll dä Plausch – die steckt vor Freud dä ganzi Chopf in Schnee und gseht amig us wie än Schneehund 😉

jetzt han ich ändlich mal dä Fotiapparat verwütscht – hanen eifach vom Tisch gschnappet 😉

dä Papi hät gmeint d’Föteli seged nöd so toll worde aber für s’ersti Mal segeds gar nöd schlecht.