hüt Abig bini bi mim Omi uf Bsuech gsi zum z’Nacht. s’Gotti und dä Götti sind au cho und händ wieder mal Gschänkli mitbracht für mich. han wieder ganz schöni Sache übercho und s’Chäppli passt prima! 🙂

hüt isch di ganzi Familie Kägi uf än Morge Spaziergang. Mir sind uf dä Albis Turm – det hät mer ä super Ussicht uf dä ganzi Zürisee und uf d’Berge. Leider hämmers nöd gschafft di ganzi Familie inkl. Ussicht ufs Bild zbringe – ev. klappts ja bim nöchschte Usflug uf dä Albis Turm 🙂

i minärä schöne blaue Yari-Badwanne fühl ich mich sehr wohl – isch eifach mega entspannend so äs Bädi znä 😉

Leider muen mich z’Mami no chli stütze aber scho bald schwümmi allnä devo! 🙂

Nach dem strängä Mäntig bliibt eim nüt anders als eifach mal richtig füsi mache – am beschte grad ufem Papi 😉

Chum di heime simmer am nöchste Tag scho uf eusä 1. grossi Usflug. Mir sind mitem Auto uf Savognin gfahre – det händ ja mini Grosseltere än Wohnwage und will die genau das Wuchenend Geburtstag gfiiret händ simmers natürli go bsueche!

S’Autofahre isch super gange – han eigentli dä ganzi Weg lang pfuset!

Nach ca. 1 1/2 Stund Fahrt simmer dänn in Savognin aacho. S’Grosi und dä Grospapi händ sich natürlich wahnsinnig gfreut das mir uf Bsuech cho sind.

Hoff ich dörf bald wieder mal uf Savognin – sobald ich chan umäsekklä isch sicher ganz lässig det obe!

Hüt isches ändlich so wiit gsi – s’Mami und ich händ hei dörfe. Dä Papi isch eus uf di 10ni go abhole cho im Triemli. S’ganzi Auto hämmer vollpackt.

Autofahre isch uu lässig – nur im Stau stah hani gar nöd gern! Nachher simmer aber beidi mega müed gsi und händ grad zämä äs Pfüsi gmacht!

Hüt hani wieder mal use dörfe und dänn hät doch voll d’Lucy dusse uf mich gwartet. Natürli bini grad mal richtig abgschlaberet worde 😉

Sie hät mi glaub grad is Herz gschlosse!

hüt bini zum 1. mal verusse gsi vorem Triemli – isch schön gsi mal a dä frische Luft nur s’Wetter isch nöd würkli guet gsi!

mis grosi hät guet uf mich ufpasst 😉

jetzt bin ich scho 1 Monet alt – top fit und gsund und munter! vorussichtlich chan Endi Monet hei zum Papi. s’Mami und ich freued eus scho jetzt! sogar zum 1. Monetstag hani Gschänkli übercho – die 2 da sind vo dä Ursina und äm Michael (Arbeitskolleg). Voll geil wäni ändlich mit dene Gummitierli chan go bädele und dä Papi und s’Mami aasprütze 😉

hüt hani s’1. mal chöne bim Mami pfuse – resp. näbed äm Mami bis ich dänn am 3 am Morge gschraue han bis sie mich dänn zu ihre is Bett gno hät 😉